Gebed – Kinders

Here dis nog vroeg,

 maar my dagtaak gaan enige oomblik begin,

 as die kinders hulle armpies lui uitstrek

 en met ogies nog styf toe vra vir ‘n vars lêmelkie.

 Maar eers wil ek net ‘n rukkie stilword,

vir U dankie sê vir die son wat stadig teen die horison opkom,

dankie sê dat ek hier waar ek voor my rekenaar sit kan sien

hoe die strale een-een hulle voete oor die top van die berg steek. 

Dankie vir my besige kinders Here. 

Dankie dat hulle volmaak is, dankie dat hulle my dae vol maak,

my so plat op die aarde hou, letterlik en figuurlik! 

Dankie dat U hulle aan my toevertrou het.  . 

Help my om hulle met liefde te dissiplineer. 

Here help my om nie my ideale op hulle af te dwing nie. 

Help my om hulle nie te wil oorbeskerm nie. 

Help my om net die beste Ma vir hulle te wees wat ek kan wees.  

Help my om in wysheid besluite te neem wat hulle toekoms raak. 

En Bo alles Here, help my om hulle na U wil groot te maak en te onderrig. 

Here seën my met net genoeg krag en geduld vir vandag,

More oggend vra ek weer vir nog ‘n dag…

Tot later dan

AMEN