Ek kan ook kook….

2009/10/27

Julle sal my seker nie glo nie, maar daar is tog ‘n paar goedjies wat ek met sukses in die kombuis kan saamslaan…  Nouwel nie baie nie, en ek is bitter skrikkerig vir nuwe idees, maar my gesin het tot nou toe darem oorleef.

Moet net nie vir my ‘n vreeslike drie bladsy resep gee nie…  my brein verdwaal by die 12de bestandeel wat nog te sê die 34 ste aanwysing…

582550klvayy93i8

Hier is een die Losmoertjies se gunstelinge:

Pikkie se Potluck! (‘n anderste resep vir almal soos ek wat rerig nie kan kosmaak nie…)

(Ek het vergeet om te sê jy moet ‘n ‘slow-cooker’ hê!!!       😀

1 Groot ui – fyn gekap

1 kg Skaapkookvleis (Dit kan sommer lekker goedkoop wees want dit gaan laaaank kook…)

1 koppie kookwyn (of die wat Saterdagaand oorgebly het)

1koppie water

1 Knorrox mutton blokkie

1 teelepel sout

1 teelepel gemengde kruie

Dis al vir eers…

Neuk nou alles in die slow-cooker en dis hier waar die geheim inkom.  As jy heeldag by die werk gaan wees, sit die pot op Auto-shift en as jy tuis gaan wees – soos op ‘n Sondagoggend sit die pot op high.

Nou gaan stort jy en trek aan, doen jou hare, plak jou bakkies op, trek die kinders aan, voer hulle Wheatbix en gaan werk toe – alternatief – klim terug in die bed of gaan speel met die kinder.

Die volgende bestanddele kan iewers gereed gekry word.

8 Wortels – geskil en in groot cubes gesny

5 Aartappels – geskil en in 8 stes gesny

4 heel soetmielies – in bite-size stukke gesny

1\2 sachet Tamatie puree.

(enige ander groente wat jou gesin eet sonder om bykans moord te skree as dit op hul borde verskyn…)

Metode vir as jy heeldag  by die huis is….

Gooi nou al bogenoemde bestanddele in die pot min of meer ‘n uur voor jy die kos gaan voorsit.   Sit ‘n potjie rys op as jy ‘n rys eter is.  Anders gaan speel nou weer met die kinders….

Metode vir as jy heeldag by die werk is….

Skakel die bediende 1 1/2 uur voor jy huistoe gaan, sê vir haar om nou die wortels en aartappels te skil en in stukke te sny.  Die mielies skoon te maak en ook in drie te sny.  Sy moet nou alles in die pot gooi en seker maak daar is nog genoeg vloeistof, anders moet sy nog ‘n halwe koppie van die wyn wat jy ingegooi het (en sy hopelik nie opgedrink het nie) bygooi.

Finale afronding

Gooi nou bietjie Chutney by en roer alles deur.

Gaan bad die kinders en dek die tafel.   Maak nou bietjie cous-cous.  (Njammies).

Bedien die gereg met die Cous-cous en ‘n vars mengelslaai.

SIEN SKOOR – EK KAN OOK KOOK!!!

Advertisements

Vir Cathrine…

2009/10/24

Noenoe, jy is Mamma se tomboy, my ‘Willetjie sonder brieke’.  Alles wat ‘Don’ doen moet jy beter doen, alles wat hy vertel moet jy ‘n eiertjie op lê, alles wat hy probeer moet jy ook probeer…  en al kry mamma nie meer jou blas handjies en voetjies skoon nie en al dryg mamma om jou te Sterri Nappy, is jy my Engelkind.

As daai gesiggie silwerskoon is en ons het klaar ons aandelikse geveg met jou krullebol gehad en mamma het klaar die traantjies afgedroog.  En jy kom maak jou tuis in Mamma se arm om te kan slapies, dan weet Mamma – God is goed….

ribbokstraat071009-167


Vermis

2009/10/21

As iemand kan help sal ek baie dankbaar wees.  Ek is op soek na my hond (nee, dis nie die ‘Swart hond’ nie.)  Hy kan werklik enige plek wees.

Hier volg ‘n kort beskrywing.

Hy kan uitgeken word aan die volgende:

Hy het net een oor, die ander een het hy in ‘n straatgeveg verloor.

Sy linkeroog het hy onlang tydens ‘n boksgeveg met die bure se Siamees beseer en moes toe verwyder word.

Sy regter agterbeen is afgesit nadat hy uiteindelik die vierwielmotorfiets gevang het.

Hy het ‘n litteken wat vanaf sy voorpoot onder sy maag deurloop tot by sy regter agterbeen (wat geamputeer is), waar hy hom misgis het met die hoogte van die heining.

Die hare op sy rug groei plek-plek nie meer nie, nadat hy per abuis die bure se teef wou dek en toe met warm water gegooi is…

Om bogenoemde rede is hy so twee weke gelede gekastreer.

Hy reageer op die naam “LUCKY

Laat weet my maar asseblief as julle hom iewers sien, my lewe is net nie dieselfde sonder hom nie!

540957x9slahm5jk


Vir John…

2009/10/17

Ouboet, Mamma kry nie die liedjie met mooi prentjies nie, maar die liedjie bly mos baaaaie mooi!!!

ribbokstraat071009-225

Ek is soooooo baie lief vir jou my Kokkos….


Lewensreëls….

2009/10/13

Daar is sekere reëls waarvolgens ek my lewe leef…  en ek glo elke mens het tog ‘n manier van doen, ‘n sekere ingesteldheid waarvolgens hy/sy lewe.  Daarom het ek besluit om (aangesien almal nou weer aan die tag is…    😀    ) ‘n paar mense te vra om ook hulle reëls met ons te deel.  Sonder verdere omhaal, hier is myne…

1.   Doen aan ander soos jy wil hê hulle aan jou moet doen….   Ek glo almal wat hier lees weet teen hierdie tyd dat ek ‘n weergebore Christen is, dat ek in die Drie-Eenheid glo en dat my Bybel my rigtingwyser is.   By hierdie eerste reël sluit ek dan dus die volgende…   Ek het die Here my God lief met my hele hart, my hele siel, my hele verstand, my emosies, my denke, my liggaam, my gedagtes, my alles….   En ek streef daarna om ALLE mense ook so lief te hê.

2.  Deel vreugde uit soos wat Hartenbos se Kersvader sweets uitdeel…  Dis verniet en net moontlik maak ek iemand se dag….     😈

3.  Moet nooit jou persoonlike piramide vergeet nie…   Myne lyk soos volg.  Heel bo in die hoek, my God, dan my gesin, dan my familie, dan my vriende en dan alle ander mense met wie ek in aanraking kom…  Deur gefokus te bly hierop, weet ek dat ek in ‘n mate beheer behou.

4.  Leef eenvoudig.   Hoe minder jy het om jou oor te bekommer, hoe minder gaan jy jou bekommer.

5.  Kies jou argumente….   Ek laat my in geen omstandighede insleep in ander se argumente nie.  Ek kies waaroor ek ‘n hêrrie gaan opskop en waaroor nie.   Die lewensbelangrike goed sal my opgesaal met my perd op sy agterpote laat staan, maar ander dinge, dinge waaroor ek in alle geval geen beheer het nie EN die wat in any way so simpel is dat ek oor ‘n week daaroor gaan lag of bloos, laat ek net verbygaan.

6.  (wat nogal gekoppel kan word aan nommer 5 ) Ek stres nie oor twak nie…  Ek kan eerlik nie omgee of die staatspresident of die dominee of wie ook al besluit om my op ‘n Sondagaand te besoek en my huis in chaos aantref nie…  Ek, Mynick en my kinders het die dag omgespeel…  ons het leggo’s gebou en karretjie gespeel en poppe gebad en DVD’s gekyk op ‘n goeie dag en op ‘n slegte dag het ons in die tuin gewerk en modderkoekies gebak en kastele gebou en die grond en moddel peul nog deur ons tone en ons het nog nie ons vingernaels skoongemaak nie…  So jammer meneer die president, dis wie ons is, kuier of los dit…

Daar is natuurlik nog ‘n hele paar, maar almal kan op een of ander manier aansluit by wat ek alreeds gesê het.

Ek tag dan nou vir Herriemerrie, Wipneus, Vlam, Sammi, Ding, Dellie, DMI en Ogies, Sonkind BB en Krista om julle reëls neer te pen.     😆

Ek kan nie wag om julle huiswerk te lees nie!

493792ooj8thq9ra


Hier’s ek weer…. (en Sammi se tag)

2009/10/09

Jip, hiers ek weer… Ek weet eerlik nie wat my besiel nie, ek weet nie of dit die regte besluit is nie… Ek het wel nie geblog nie, maar ek weet alles wat hier aangegaan het…  En ek hou nie baie daarvan nie.   Wat my deksel is, is dat iets wat ‘n persoon vir ontspanning/ontvlugting/plesier doen jou wese so kan kwes…  Maar dit kom eenvoudig weer terug na die ou-ou punt van my dat mense nie meer omgee vir ander se gevoelens nie…

Elkeen wil REG wees.  Elkeen se Punt is korrek.  Elkeen wil op sy eie misbolletjie sit en koning kraai en bewaar die een se siel wat nie van sy mis wil eet nie…  Maar dit daargelaat, ek is nie ‘n persoon wat graag mond uitspoel nie en as ek dit doen, dan doen ek dit behoorlik en gaan aan met my lewe…  wat tussen hakkies ‘n plesier is…  Ek lief my man stukkend, ek is mal oor my kinders (loopneuse en al), ek hou nogal van my werk en vir meer kan ek nie vra nie.

Nou – my liefste vriendin     😀     – Sammi – het my getag!   Jitte, en dan is dit nog ‘n blessitse moeilike tag ook!  Sy wil hê dat ons ons areas moet verkoop…  Gmf…

Nou goed – en hierdie is ‘n persoonlike mening…  Jitte besluit self…

Voordele daaraan om in Upinton te woon.

1.   Daar is ‘n lughawe in Upington

2.  Daar is ‘n rivier deur Upington

3.  Daar is baie huise te koop teen relatief billike pryse in Upington

4.  Die meeste groot kettingwinkels het takke in Upington

5.  Daar is ‘n Privaathospitaal en goeie staatshospitaal in Upington

6.  Daar is ‘n verskeidenheid baie goeie skole en kleuterskole in Upington

woestyn

Hoekom ek nie in Upington wil woon nie!!!

1.   In die somer gaan jy morsdood van die hitte…

2.  In die winter gaan jy morsdood van die koue…

3.  As jy baie lief is vir sand is hierdie die ideale plek om te bly…  Ek haat sand…  Dit voel mos al vir my asof die hele Kalahari deur die dag in my huis ingewaai het die oomblik as ek saans die voordeur oopstoot.

4.  Die mense is freaking ongeskik in Upington

5.  My ouers en familie bly 8 ure se ry van ons af

6.  Mynick se familie bly 9 ure se ry van ons af

7.  Werk is skaars en salarisse is lagwekkend!

8.  Ek weet beter as enigeen dat mens se geluk van jouself afhang, maar wragies hierdie dorp was/is nie goed vir my nie.

Nou toe Sammi – bietjie agterstevoor en onderstebo, maar my huiswerk is gedoen!!   LOL!!!

BTW – Iemand het nie dalk vir my en my man werk in Gauteng nie!!!       😈